We are now publishing here our leaflet that we distributed today inside Toyota, about the demotion of the former First Vice President of H.R. Department Lito Aligada due to his extreme anti-union activities against TMPCWA .

The workers are shouting the ouster of Aligada.

LITO ALIGADA: Sagad-sagaring tuta ng kapitalista

SINIBAK SA PWESTO

Isang “demotion” at hindi isang paglilipat lamang ang iginawad na parusa kay Lito Aligada. Mula sa dating pusisyon na First Vice President ng H.R. Department, na-demote si Aligada sa pagiging bagong Department Production Manager lamang.

Kung tutuusin, hindi sapat ang ginawang simpleng demosyon kay Aligada. Sa halip, dapat pinatalsik na ito sa kumpanya dahil sa todong pagkawasak ng imahe ng Toyota. Higit ang kanyang imoral na pinag-gagawa sa mga manggagawang rank and file, lalo pa sa kanyang pambababoy sa unyon nating TMPCWA.

Marami ang hindi nakakaalam nito o marahil ay sadyang itinago sa mga manggagawa ang tunay na dahilan kung bakit biglaang inilipat sa bagong pusisyon si Lito Aligada. Hindi pa man nilalagdaan ang bogus na kompromisadong CBA ng TMPCLO at ng Toyota management, kagyat na ipinatupad na ang paglilipat kay Aligada. Nangangamba ang Top Management sa maaaring idulot na mga karagdagang problema kung pananatilihin pa ang hindi na epektibong si Aligada.

Para hindi mahalata ang ginawang pagde-demote kay Aligada, inilagay pa rin siya sa isang mataas na pusisyon. Iyun nga lang, dalawa sila ni G. Marcelino na nag-aagawan sa isang pusisyon.

Ayon sa ulat ng ilang HR managers ng mga Suppliers at managers ng Toyota na nakakaintindi at nakakaunawa sa makatuwiran at lehitimong laban ng unyong TMPCWA, sagad ang pambababoy na ginawa nitong si Aligada laban sa unyon at sa pangulo na si Ed Cubelo. Ayon sa kanila, sa mga meetings na dinaluhan nila, si Aligada ang nagpa-facilitate ng mga Man-Com Meetings, Coordination Meetings, gayundin ang pakikipag-usap nito sa mga suppliers ng Toyota.

Sagad ang anti-manggagawa at anti-unyong tindig ni Aligada. Kapag binubuksan ang paksa sa usapin ng pag-uunyon sa Toyota, maagap na sasagot itong si Aligada na nanggugulo lamang diumano ang TMPCWA. Mabilis din maglubid ng walang batayang kwento at itahi ni Aligada ang unyong TMPCWA bilang komunistang organisasyon, gayundin ang pangulo nito. Kakatwang ibino-broadcast nito na pinagbabantaan daw ang buhay niya.

Ang ganitong paglikha ng kanyang sariling multo ang lumikha ng hysteria at dahilan kung bakit sa bungad pa lang ng gate, itinambak ang kung sinu-sinong gwardya, pulis, at kung anu-ano pa. Nasabi ng isang HR Manager, mula sa isang pagawaan ng wiring harness, ang kanyang pagkabahalang tumuloy sa pagawaan ng Toyota sa Santa Rosa. Ayon sa kanya, hindi simpleng gwardya ang mga bantay ng Toyota kundi mga mersernaryong mamamatay-taong binihisang gwardya.

Sino kaya ang papatol kay Aligada sa isang palasak na operador na anti-manggagawa? Kung hindi lang “graceful exit” na demosyon ang ipinataw sa kanya ng Toyota Management, marahil sa kangkungan na siya pulutin.

Sa sobrang desperasyon ni Aligada na supilin at durugin ang makatarungang pakikibaka ng TMPCWA, lumilikha ito ng mga senaryong nakapagbigay ng takot sa Top Management ng Toyota.

Waring nahimasmasan na ang Toyota Management kung kaya demosyon ang ipinataw nito kay Aligada. Saksi mismo ang Top Level Representative kung paano balasubas na humarap at nakitungo si Aligada sa mga lider ng TMPCWA noong bago maganap ang bogus na Certification Election ng Pebrero 2006.

Sa labis na pagkatuta sa kapitalista, instrumental si Aligada sa pagsupil ng kapitalistang Toyota sa pagbibinbin ng matagal at pagpapalala ng labor dispute sa Toyota.

Para sa TMPCWA, hindi sapat na i-demote o ilipat lamang sa ibang pwesto si Lito Aligada sa problemang inihasik nito. Isa si Aligada sa mga masugid na naghatid sa Toyota bilang numero unong Union Buster.

Sa una pa man, hindi nagkamali sa pagsusuri ang TMPCWA sa mahalagang papel at pagkakasangkot ni Aligada sa ibayong pagpapahirap sa mga manggagawa sa Toyota. Sa huling pakikipag-negosasyon sa International Metal Federation (IMF), kaharap si Aligada at ang Toyota Top Brass Management noong Pebrero 2006, sinabi ng pangulo ng unyong TMPCWA, Kung noong una pa man ay tinanggal na itong is Aligada, hindi sana magiging ganito kalala ang problema.

Patalsikin si Aligada! Ito ang nagkakaisang sigaw ng mga manggagawa sa Toyota.

Gaya ng titulong Human Relations, umaasa ang unyong TMPCWA sa makataong pakikipagharap at pakikitungo ng bagong upo na HR Manager na si Bb. Tini Arevalo, at maisagawa nito ang paghaharap at tuwirang pagsasaayos ng labor dispute sa Toyota.

Aligada, patalsikin!

Toyota Management, tapusin na ang labor dispute!

Toyota Motor Philippines Corporation Workers Association (TMPCWA)
Ika-2 ng Pebreroo 2007